MIMEA HUHITAJI MIZIZI ILI KUKUA; BINADAMU TUNAHITAJI WATU ILI KUFANIKIWA


Na; Mashaka J. Siwingwa

    +255764987588

___________________________________________________________________________________


Ili mimea iweze kuota, kukua na kustawi vizuri inahitaji mizizi imara na yenye uwezo wa kustahimili ukame wakati wa dhiki. Mizizi huisaidia mimea kuweza kufyonza maji katika umbali mrefu hatimaye kuusaidia mmea kuendelea kuishi. Kustawi kwa majani na matawi ya miti ni matokeo ya kazi ngumu inayofanywa na mizizi ambayo hata hivyo siyo rahisi kuiona, kwa sababu hupatikana ardhini. Mizizi haihitaji kujionesha ili kufanya kazi ya kufyonza maji na kuyasaidia majani kustawi.

Wakati mwingine ni kwamba, mizizi inapata shida sana kutafuta maji katika umbali mrefu hasa wakati wa ukame. Naam... mizizi hustahimili dhiki zote hizo. Binadamu na wanyama wengine wapitapo kando ya mimea hiyo hufurahia kuiona ikiwa imestawi vizuri bila kujua kama kuna kitu kinaitwa mizizi kinafanya kazi chini kwa chini.

Mizizi haihitaji shukrani ya binadamu wanaopata kivuli ili kuendelea kufyonza maji wala haihitaji fadhila za wanyama walao majani ili kuendelea kufyonza maji. Mizizi haihitaji shukrani ili kuendelea kufanya kazi.

Naam... Binadamu tumeathirika sana katika shughuli zetu. Hasa zile ambazo ni kwa manufaa ya wenzetu. Bila kushukuriwa huwa hatufanyi kazi kabisa na tunaishia kulaumu na kulaani kwa kauli lukuki kama vile "shukrani ya punda mateke"  na " tenda wema nenda zako."

Kauli za namna hii huishia kutuumiza sisi wenyewe huku zikiwaacha watesi wetu bila jeraha lolote lile. Pengine ni kutokana na sisi kushindwa kutambua watesi wetu sahihi ni watu wa namna gani. Wakati mwingine tunakuwa tunashindana na watu wasioshindana nasi, tunapigana na watu wasiopigana nasi.

Ndiyo, huwa inatokea mara nyingi sana; unajikuta unamchukia mtu ambaye hata hakufahamu, unakuwa na fitina na mtu ambaye hajawahi kukufanyia chochote kibaya. Haya ni matokeo ya mioyo yetu kwani ndiyo inayoamua kumpenda au kumchukia mtu. Hata hivyo, tunayonafasi kubwa sana ya kudhibiti upendo au chuki zetu kwa watu wasiokuwa na chuki na sisi.

Swali la kujiuliza hapa siyo mapenzi wala chuki zetu kwa watesi wetu. Swali ni kwamba; kwa nini inatokea mtu anasema "shukrani ya punda mateke?" Jibu la haraka haraka hapa ni kwamba mtu anakuwa anategemea kupata kitu chochote kutoka kwa watu tulioweza kuwasaidia. Tunapokosa kitu hicho basi tunaishia kuwalaumu wenzetu na kujisemea kwamba shukrani zao zimekuwa mateke kwetu. Lakini tukumbuke pia punda hutubebea mizigo!

Wakati mwingine unakuta watu tunawafanyia wengine vile tusivyopenda kufanyiwa sisi wenyewe ndiyo maana hata maandiko matakatifu yakatutaka tuondoe vibanzi vilivyomo ndani ya macho yetu wenyewe kabla hatujakwenda kwa jirani zetu.

Kumsaidia mtu kwa kutegemea kupata kitu fulani kumechangia kwa kiasi kikubwa sana kuvunjika kwa mahusiano yetu mema na rafiki zetu. Ngoja nikupe mfano mdogo;

Kuna rafiki yangu alikuwa anaumwa vibaya sana kiasi kwamba hakuwa hata na uwezo wa kufua nguo zake. Akaamua kumwomba mwenzake amsaidie kufua. Mwenzake alikubali bila kinyongo kumfulia jamaa nguo zake. Baada ya siku kadhaa jamaa alipona na akawa anaendelea vizuri tu. Ilipita kama wiki moja hivi mwenzake alimwomba na yeye amfulie fulana yake ya mazoezi lakini hakukubali. Jamaa akaishia kusema shukrani ya punda mateke na hatimaye kuvunja urafiki wao. Tatizo alifanya hisani huku akitegemea kufanyiwa kama vile alivyomfanyia rafiki yake. Alisahau kama binadamu tunatofautiana.

Unapomfanyia mtu hisani na unategemea kurudishiwa vile ulivyotaka ni kutengeneza stress za kujitakia. Kuna msemo wa wenzetu wanasema "always give without remembering and receive without forgetting." Kama sote tukiweza kutoa pasi na kukumbuka na kupokea pasi na kusahau basi kamwe hatutatengenezeana stress katika maisha yetu.

Kwa kufanya hivyo, tutaweza kuwasaidia wenzetu bila vinyongo vyovyote vile na hata wasipotulipa fadhila hatutadhurika kwa namna yoyote ile. Zaidi, tutakumbuka kufanya hisani pia pale tunaposaidiwa na wenzetu maana kutoa ni kujiwekea akiba.

Zaidi, tukumbuke kwamba kumpa anayekupa si kumpa bali ni kumlipa... Kwa hiyo, tusichague watu wa kuwasaidia kwenye maisha yetu. Tuwasaidie watu kwa kadiri tuwezavyo maana hatujui kwenye misiba yetu nani na nani watahudhuria.

Always give without remembering and receive without forgetting.

Mashaka Siwingwa

Mzumbe University

Comments

  1. UnknownMay 24, 2021 at 10:24 PM

    Nzuri, na nikwel mkuu. Watu ndio wanaotufanya tufanikiwe.

    ReplyDelete

Post a Comment

Popular posts from this blog

KWA NINI WATU WENGI HAWANA UTAMADUNI WA KUJISOMEA VITABU?

Image
 Kwa Nini Watu Wengi Hawana Utamaduni/Hawapendi Kujisomea Vitabu?  (Sehemu ya Kwanza) Habari... Siku kadhaa zilizopita niliandika kwenye kurasa zangu za mitandao ya kijamii mara baada ya kufanya kipindi cha 'The Fix' cha redio kuhusiana na mada inayosema 'Kwa Nini Watu Wengi Hawapendi Kusoma Vitabu?' Nakumbuka baada ya chapisho lile niliahidi kukufikishia somo lote hatua kwa hatu. Sasa leo natamani somo hili liwe kama sehemu ya kwanza na mada ile ile ambapo leo tutaangalia sababu za watu wengi kutokuwa na mwamko, shauku ama utamaduni wa kujisomea vitabu. Zifuatazo ni baadhi tu ya sababu za watu wengi kutokuwa na utamaduni wa kujisomea vitabu; >> Mabadiliko ya Teknolojia (Simu na Mitandao ya Kijamii); Vifaa vya kisasa kama simu za mkononi, kompyuta, na mitandao ya kijamii vimechukua nafasi kubwa katika maisha ya watu. Watu wengi wanapendelea kutumia muda wao kwenye mitandao badala ya kusoma vitabu. >> Video na Habari za Papo kwa Papo; Watu wanaweza kupata hab...
Read more

Mbwa Bado Hajafa! (Usikubali Kukata Tamaa)

Image
Meshack Siwingwa 0764 987 588 Jamaa mmoja alikuwa akisafiri kutoka nyumbani kwake kuelekea mjini majira ya saa moja asubuhi. Baada ya mwendo wa kama saa mbili hivi alikutana na kijana mmoja akiwa amesimama barabarani akingojea kumwona mtu aendaye mjini ili aweze kumuomba 'lift.' Kijana huyu alikuwa amebeba vifaa kadhaa vinavyotumika kwa ajili ya usafi wa kuoshea magari vile ambavyo alivimudu kuvibeba. Kando ya huyu kijana alikuwa amelala mbwa aliyeonekana kuwa dhooofu bin hal kwani alikuwa akitweta kwa uchungu uliosababishwa na maumivu aliyokuwa nayo. Yule kijana alipunga mkono kwa jamaa ndipo jamaa aliposimamisha gari yake na kuamua kumsikiliza kijana. Kijana alimweleza jamaa kwamba alikuwa anaelekea mjini kumtibia mbwa wake na kwamba baadhi ya vifaa kadha alivyokuwa navyo alitegemea apate kazi za kuosha magari pindi afikapo mjini ili aweze kupata fedha za kumudu gharama za matibabu ya mbwa wake. Jamaa alishangaa sana baada ya kuona hali ya mbwa wa yule kijana na ndipo alipoam...
Read more

KAULI KUMI ZA HAYATI MWL. JULIUS K. NYERERE KUHUSU ELIMU NDANI NA NJE YA NCHI

Na; Mashaka Siwingwa +255764987588 ----------------------------------------------------------------------------------------------------------------------------- Ni miaka mingi imepita tangu atutoke baba wa taifa Hayati, Julius Kambarage Nyerere. Ushujaa na uhodari wake katika kupambanua mambo pamoja na kueleza vitu bayana kunamfanya aendelee kuwa shujaa asiyesahaulika. Wakati wa uhai wake, baba wa taifa alisisitiza sana juu ya suala la elimu hapa nchini. Falsafa yake ya kuamini kwamba elimu ndiyo silaha pekee ya kuufikia ukombozi wa kweli hasa kifikra. Katika nyakati tofauti tofauti, katika sehemu tofauti na katika muktadha tofauti, Hayati baba wa taifa aliweza kuonesha wazi msimamo wake juu ya mfumo wetu wa elimu. Kati ya mengi aliyoyazungumza, leo nimeamua nikukusanyie kauli kumi tu alizowahi kuzitoa shujaa huyu.  Twende sawa; 1. Kauli aliyoitamka mnamo tarehe 31 Desemba, 1969 akizungumza na vyombo vya habari kuhusu malengo ya Elimu ya Watu Wazima. Alisema, "... education is som...
Read more