KAMA HUJAFANYA KITU HUWEZI KUWA NA CHA KUPOTEZA

Na; Mashaka Siwingwa

+255764987588

-----------------------------------------------------------------------------------------------------------------------------

Ninajua watu wengi huwa tunaumia sana tunapopoteza vitu vyetu vya thamani. Wakati mwingine tunapoteza vitu ambavyo huwa tunaamini pengine bila vitu hivyo hatuwezi kufika popote. Vitu hivyo vyaweza kuwa ni kama vile wapenzi, mali, mitaji, jamaa zetu wa karibu, na kadhalika. Mara nyingi tunapopoteza vitu hivi huwa tunaamua kukata tamaa na kuamini kwamba kamwe havitatokea tena vitu kama hivyo kwenye maisha yetu. 

Ni kweli kabisa, uthamani wa vitu hivi huwa unatufanya tuamini kwamba hatutapata vitu vingine mbadala wa vitu hivyo. Hii ni kutokana na ukweli kwamba uthamani wa vitu hivi haumithilishwi na kitu kingine chochote kile. Ni vitu maalumu na vya kipekee sana kwenye maisha yetu.

Lakini, kumbuka kuvunjika kwa mpini si mwisho wa kilimo. Mpini unaweza ukavunjika na bado ukaendelea kupalilia kwa kung'olea nyasi kwenye shamba lako. Una kila sababu ya kutabasamu tena. Haya yote yanawezekana ukitambua tu kwamba wewe ni wa thamani kupita hata mtaji wako. Ndiyo maana watu watakuja kwenye msiba wako siyo msiba wa wewe kupoteza mtaji. Roho yako ni ya thamani kuliko utajiri ulioupoteza. 

Huna sababu ya kukata tamaa kwa sababu wewe si wa kwanza kupata hasara kubwa namna hiyo. Kumbuka hata kucha hukatwa kila siku lakini hazikati tamaa kuota. Zinaota tena na tena. Zingekuwa na moyo kama wako; wa kukata tamaa kamwe zisingeota tena! 

Mwimbaji wa muziki wa injili na mchungaji, Emmanuel Mgaya katika kibao chake cha "Hakuna Jipya Chini ya Jua" anasema hayo yote yalikuwepo, yapo na yataendelea kuwepo. Wewe si wa kwanza kukutana nayo.

Mwandishi wa kitabu cha "Tough Times Never Last But Tough People Do," anasema kamwe nyakati ngumu hazidumu lakini watu wagumu na imara hudumu katikati ya nyakati ngumu. Unayo nafasi ya kuinuka na kusimama tena. Jipe moyo, pambana. Wewe ni mtu imara katikati ya nyakati ngumu.

Ninakumbuka siku moja  aliyekuwa Rais wa awamu ya tatu, Mhe. Benjamin Mkapa (Mungu ailaze roho yake mahali pema peponi) aliwahi kusema kwamba ukitaka usipoteze kitu basi usifanye chochote kile. Ndiyo, siri ya kutokupoteza kitu ni kutokufanya chochote kile. Unapokuwa hujafanya chochote kile huwezi kulalamika maana huna cha kupoteza.

Watu wavivu kulima huwa hawana cha kupoteza wakati mvua zinapogoma kunyesha, wafugaji huwa hawana cha kupoteza wakati biashara zinapodorora sokoni. Unajua ni kwa nini? Ni kwa sababu wanakuwa hawafanyi hicho kitu. Hivyo, ukitaka usipoteze kitu chochote kile, basi usifanye kitu chochote kile. Na siku zote uchungu wa kilimo wanaujua wakulima maana ndiyo wanaopata hasara wakati kilimo kinapokuwa kigumu.

Ni asili ya binadamu wote kujishughulisha. Kamwe huwezi kuacha kujishughulisha eti kwa sababu ulipata hasara kwenye biashara yako. Moja ya makundi yanayoishi kwa imani kali sana ni wakulima-tena wa mazao ya chakula. Ninakumbuka mwaka 2012 kulikuwa na ukame kiasi ukanda wa nyanda za juu kusini. Siku moja nilimuuliza baba yangu; "mwaka huu mvua zimesumbua baba mtalima tena kweli?" Baba alichonijibu alisema tu kwamba; " unadhani tusipolima tutakula nini? Hata tukipata kichache tunapambana hivyo hivyo kuliko kukata tamaa eti kwa sababu mvua hazitoshi." 

Nilijifunza kitu kikubwa sana kutoka kwenye maneno ya baba. Kamwe hakuwa tayari kukata tamaa eti kwa sababu mvua zilikuwa hazinyeshi za kutosha!

Baba hakuwa na elimu yoyote ya kumfanya hata asome maandiko mbalimbali ya kuhamasisha lakini hakuwa tayari kukata tamaa, je, wewe uliyepata bahati ya kusoma andiko hili?

Kumbe hata wewe ndugu yangu huna sababu ya kukata tamaa. Kumbuka hata mwarobaini kila kitu ni dawa; kuanzia majani, mbegu zake, magamba yake hata mizizi yake. Na muda wote watu wanaitumia watakavyo lakini haiachi kumea! Una kila sababu ya kusimama tena na tena na kusonga mbele mwanawane!

Mbu wanapomshambulia mtu wanakuwa hata kumi. Mmoja anaponaswa kibao kinalia kama baruti lakini wale wengine hawakati tamaa. Huondoka tu kwa muda na baadaye hurudi. Hata hujiulizi kwa nini vitu visivyo na utashi haviko tayari kukata tamaa?

Ukitaka usiumie, usifanye chochote kile! Huna sababu ya kuacha kupambana eti kwa sababu ulipata hasara! Songa mbele ndugu yangu.

Mashaka Siwingwa

Mzumbe University.


Comments

Post a Comment

Popular posts from this blog

KWA NINI WATU WENGI HAWANA UTAMADUNI WA KUJISOMEA VITABU?

Image
 Kwa Nini Watu Wengi Hawana Utamaduni/Hawapendi Kujisomea Vitabu?  (Sehemu ya Kwanza) Habari... Siku kadhaa zilizopita niliandika kwenye kurasa zangu za mitandao ya kijamii mara baada ya kufanya kipindi cha 'The Fix' cha redio kuhusiana na mada inayosema 'Kwa Nini Watu Wengi Hawapendi Kusoma Vitabu?' Nakumbuka baada ya chapisho lile niliahidi kukufikishia somo lote hatua kwa hatu. Sasa leo natamani somo hili liwe kama sehemu ya kwanza na mada ile ile ambapo leo tutaangalia sababu za watu wengi kutokuwa na mwamko, shauku ama utamaduni wa kujisomea vitabu. Zifuatazo ni baadhi tu ya sababu za watu wengi kutokuwa na utamaduni wa kujisomea vitabu; >> Mabadiliko ya Teknolojia (Simu na Mitandao ya Kijamii); Vifaa vya kisasa kama simu za mkononi, kompyuta, na mitandao ya kijamii vimechukua nafasi kubwa katika maisha ya watu. Watu wengi wanapendelea kutumia muda wao kwenye mitandao badala ya kusoma vitabu. >> Video na Habari za Papo kwa Papo; Watu wanaweza kupata hab...
Read more

Mbwa Bado Hajafa! (Usikubali Kukata Tamaa)

Image
Meshack Siwingwa 0764 987 588 Jamaa mmoja alikuwa akisafiri kutoka nyumbani kwake kuelekea mjini majira ya saa moja asubuhi. Baada ya mwendo wa kama saa mbili hivi alikutana na kijana mmoja akiwa amesimama barabarani akingojea kumwona mtu aendaye mjini ili aweze kumuomba 'lift.' Kijana huyu alikuwa amebeba vifaa kadhaa vinavyotumika kwa ajili ya usafi wa kuoshea magari vile ambavyo alivimudu kuvibeba. Kando ya huyu kijana alikuwa amelala mbwa aliyeonekana kuwa dhooofu bin hal kwani alikuwa akitweta kwa uchungu uliosababishwa na maumivu aliyokuwa nayo. Yule kijana alipunga mkono kwa jamaa ndipo jamaa aliposimamisha gari yake na kuamua kumsikiliza kijana. Kijana alimweleza jamaa kwamba alikuwa anaelekea mjini kumtibia mbwa wake na kwamba baadhi ya vifaa kadha alivyokuwa navyo alitegemea apate kazi za kuosha magari pindi afikapo mjini ili aweze kupata fedha za kumudu gharama za matibabu ya mbwa wake. Jamaa alishangaa sana baada ya kuona hali ya mbwa wa yule kijana na ndipo alipoam...
Read more

KAULI KUMI ZA HAYATI MWL. JULIUS K. NYERERE KUHUSU ELIMU NDANI NA NJE YA NCHI

Na; Mashaka Siwingwa +255764987588 ----------------------------------------------------------------------------------------------------------------------------- Ni miaka mingi imepita tangu atutoke baba wa taifa Hayati, Julius Kambarage Nyerere. Ushujaa na uhodari wake katika kupambanua mambo pamoja na kueleza vitu bayana kunamfanya aendelee kuwa shujaa asiyesahaulika. Wakati wa uhai wake, baba wa taifa alisisitiza sana juu ya suala la elimu hapa nchini. Falsafa yake ya kuamini kwamba elimu ndiyo silaha pekee ya kuufikia ukombozi wa kweli hasa kifikra. Katika nyakati tofauti tofauti, katika sehemu tofauti na katika muktadha tofauti, Hayati baba wa taifa aliweza kuonesha wazi msimamo wake juu ya mfumo wetu wa elimu. Kati ya mengi aliyoyazungumza, leo nimeamua nikukusanyie kauli kumi tu alizowahi kuzitoa shujaa huyu.  Twende sawa; 1. Kauli aliyoitamka mnamo tarehe 31 Desemba, 1969 akizungumza na vyombo vya habari kuhusu malengo ya Elimu ya Watu Wazima. Alisema, "... education is som...
Read more