NI MUHIMU SANA KUSHUKURU KWA NAMNA ULIVYO

...wakati tunafurahi upande wa kusi, waliopo kasi wanalia...!

Naam imekuwa desturi kabisa kwa watu kufurahia maisha kwa 'kula bata' pale tunapokuwa na afya bora. Mara nyingi tumekuwa tukiwaarika marafiki zetu kuhudhuria 'Night Clubs' na kufurahi pamoja nao. Wakati mwingine tumewagharamia wapenzi wetu kwa kuwanunulia zawadi kabambe na zenye gharama fikirishi! 

Sijasema ni jambo baya la hasha! Bali ni desturi tu ambazo kama binadamu tumejijengea.

Siku moja nilifanikiwa kununua gazeti moja na kupitia-pitia habari kedekede zilizokuwa zimeandikwa gazetini humo huku zikihaririwa na wataalamu nguli! Nilivyoufikia ukurasa wa sita wa gazeti hilo nikakutana na kichwa cha habari  kikubwa kimeandikwa, "MREMBO ateseka miaka 5 kitandani, achungulia kaburi." Kichwa cha habari hiki kilishadidiwa kwa maandishi meusi tii tena hata picha ya msichana mmoja iliyokuwa imeambatanishwa na ujumbe huu, hata hivyo nilishindwa kung'amua vizuri muonekano wake kutokana na picha yake kukolezwa wino mweusi mithili ya tai, ilikuwa nyeusi kabisa...! Yaani maandishi meusi, picha nyeusi, hata muonekano wa ule ukurasa ulikuwa mweusi tii!

Nilipata shauku kubwa sana moyoni mwangu na kutaka kujua ni kipi kilikuwa kimejiri katika ukurasa huo ndipo niliweza kukutana na sentensi isemayo; "... niliugua tetekuwanga, baadaye vipele vikawa vinatoa usaha na funza... Nilipokwenda hospitalini kwenye vipimo nikaambiwa nilikuwa naumwa kansa ya ngozi... " Kansa si mnaifahamu lakini waungwana? Basi niliingia katika tafakuri na simanzi nzito baada ya kuendelea kuisoma habari hii. Nilijikuta katika jinamizi zito la mawazo na kisha moyoni nikajisemea, Ama hakika Dunia Duara! 

Yaani wakati watu tunasherehekea kuvuka mwaka na kuingia mwaka mpya kuna wenzetu wasio na tumaini kabisa, wamekata tamaa ya kusimama tena, wako hohehahe, wamechoka! Dunia Duara! Can you feel the taste? 

Yaani katika hii dunia iko hivi; kuna watu wanaofurahia maisha na kuna watu wanaoteseka na ugumu wa maisha. Kuna watu wanaolia na mapenzi wakati huo kuna watu mapenzi yao yanastawi mpaka wanatamani kutoa shuhuda kanisani! Yaani mpaka ukifika wakati wa kutoa sadaka wanatamani kumwambia shemasi 'kata ya watu wawili! '. Wakati vijana wanatamani kuingia ndoani kuna kundi kubwa la wahanga wa ndoa kila leo wako mahakamani kutaka talaka za ndoa hizo! Yapo mambo mengi sana ya kuyasema lakini ngoja nifupishe tu. 

Siku moja tukiwa katika semina ya vijana kuhusu masuala ya mahusiano na ndoa mwalimu aliwahi kusema; "Ndoa ni kama tufe, walio ndani wanatamani kutoka na walio nje wanatamani kuingia!" Sina uhakika sana maana sijafika huko japo na mimi pia ni mojawapo wa watu wenye viherehere vya kuingia huko! Leo inawezekana ni ukweli huu! Mimi simo!

Katika ulimwengu huu uliojaa raha na karaha tele, furaha na huzuni nyingi, dhiki na riziki mara dufu, vichungu na vitamu maelfu.... Lazima tujitahidi tujenge utamaduni wa kitu kimoja. Nacho ni shukrani kwa muumba!

Ndugu yangu, wakati unafurahi kuna watu wana huzuni, wakati unacheka kuna watu wanaolia, wakati unakunywa kuna watu wana kiu! Ndiyo... Jifunze kuthamini kile kilichopo mkononi mwako.

Jijengee utamaduni wa kumshukuru muumba wako kwa hivyo ulivyo. Mshukuru asubuhi, mchana na jioni. Shukuru sana kwa kile ulichonacho maana ndiyo mlango wa kile ambacho hauna. Wakati wewe unalalamika hauna sofa set ndani kuna watu hawana hata kilago cha kulalia! Mshukuru muumba wako kwa hivyo ulivyo.

Jifunze kushukuru hata kwa vichache ameimba Bony Mwaitege katika wimbo wake wa 'Moyo wa shukrani'.

Ni kweli unapitia magumu sana... Ni kweli upo katika dhiki nyingi lakini angalau sema ahsante Mungu kwa kunifikisha hapa... Kuzimu hakuna shukrani. Shukuru ungali hai! 

Ukiwa unapitia magumu shukuru Mungu.

Ukiwa katika furaha mshukuru Mungu pia.

Maisha hubadilika, watu hatufanikiwi kwa kukata tamaa... Kukata taamaa ni dhambi...

Shukrani hufungua milango ya kupata zaidi.

Muumba humbariki na kumzidishia mara mia mtu mwenye shukrani!

Jifunze kushukuru.

Dunia Duara!

#Chief_Editor@

MSOMI HURU

Comments

Post a Comment

Popular posts from this blog

KWA NINI WATU WENGI HAWANA UTAMADUNI WA KUJISOMEA VITABU?

Image
 Kwa Nini Watu Wengi Hawana Utamaduni/Hawapendi Kujisomea Vitabu?  (Sehemu ya Kwanza) Habari... Siku kadhaa zilizopita niliandika kwenye kurasa zangu za mitandao ya kijamii mara baada ya kufanya kipindi cha 'The Fix' cha redio kuhusiana na mada inayosema 'Kwa Nini Watu Wengi Hawapendi Kusoma Vitabu?' Nakumbuka baada ya chapisho lile niliahidi kukufikishia somo lote hatua kwa hatu. Sasa leo natamani somo hili liwe kama sehemu ya kwanza na mada ile ile ambapo leo tutaangalia sababu za watu wengi kutokuwa na mwamko, shauku ama utamaduni wa kujisomea vitabu. Zifuatazo ni baadhi tu ya sababu za watu wengi kutokuwa na utamaduni wa kujisomea vitabu; >> Mabadiliko ya Teknolojia (Simu na Mitandao ya Kijamii); Vifaa vya kisasa kama simu za mkononi, kompyuta, na mitandao ya kijamii vimechukua nafasi kubwa katika maisha ya watu. Watu wengi wanapendelea kutumia muda wao kwenye mitandao badala ya kusoma vitabu. >> Video na Habari za Papo kwa Papo; Watu wanaweza kupata hab...
Read more

Mbwa Bado Hajafa! (Usikubali Kukata Tamaa)

Image
Meshack Siwingwa 0764 987 588 Jamaa mmoja alikuwa akisafiri kutoka nyumbani kwake kuelekea mjini majira ya saa moja asubuhi. Baada ya mwendo wa kama saa mbili hivi alikutana na kijana mmoja akiwa amesimama barabarani akingojea kumwona mtu aendaye mjini ili aweze kumuomba 'lift.' Kijana huyu alikuwa amebeba vifaa kadhaa vinavyotumika kwa ajili ya usafi wa kuoshea magari vile ambavyo alivimudu kuvibeba. Kando ya huyu kijana alikuwa amelala mbwa aliyeonekana kuwa dhooofu bin hal kwani alikuwa akitweta kwa uchungu uliosababishwa na maumivu aliyokuwa nayo. Yule kijana alipunga mkono kwa jamaa ndipo jamaa aliposimamisha gari yake na kuamua kumsikiliza kijana. Kijana alimweleza jamaa kwamba alikuwa anaelekea mjini kumtibia mbwa wake na kwamba baadhi ya vifaa kadha alivyokuwa navyo alitegemea apate kazi za kuosha magari pindi afikapo mjini ili aweze kupata fedha za kumudu gharama za matibabu ya mbwa wake. Jamaa alishangaa sana baada ya kuona hali ya mbwa wa yule kijana na ndipo alipoam...
Read more

KAULI KUMI ZA HAYATI MWL. JULIUS K. NYERERE KUHUSU ELIMU NDANI NA NJE YA NCHI

Na; Mashaka Siwingwa +255764987588 ----------------------------------------------------------------------------------------------------------------------------- Ni miaka mingi imepita tangu atutoke baba wa taifa Hayati, Julius Kambarage Nyerere. Ushujaa na uhodari wake katika kupambanua mambo pamoja na kueleza vitu bayana kunamfanya aendelee kuwa shujaa asiyesahaulika. Wakati wa uhai wake, baba wa taifa alisisitiza sana juu ya suala la elimu hapa nchini. Falsafa yake ya kuamini kwamba elimu ndiyo silaha pekee ya kuufikia ukombozi wa kweli hasa kifikra. Katika nyakati tofauti tofauti, katika sehemu tofauti na katika muktadha tofauti, Hayati baba wa taifa aliweza kuonesha wazi msimamo wake juu ya mfumo wetu wa elimu. Kati ya mengi aliyoyazungumza, leo nimeamua nikukusanyie kauli kumi tu alizowahi kuzitoa shujaa huyu.  Twende sawa; 1. Kauli aliyoitamka mnamo tarehe 31 Desemba, 1969 akizungumza na vyombo vya habari kuhusu malengo ya Elimu ya Watu Wazima. Alisema, "... education is som...
Read more