AHADI KUMI ZITAKAZO KUFANYA UFIKIE NDOTO ZAKO MWAKA 2021( TOLEO LA PILI)

Mashaka J. Siwingwa

      (Mzumbe University)

          +255774987588
_______________________________________

Kwanza kabisa tumshukuru mwenyezi Mungu atupaye uzima na afya kwa kutuvusha salama kutoka mwaka 2020 na kutuleta katika mwaka wa mipango mingi wa 2021. Inawezekana mwaka 2020 haukuwa wa furaha kwako, haukuwa wa mafanikio kwako, mambo mengi uliyopanga hayakufanikiwa. Naomba tunapokwenda kuuanza mwaka mpya ukajiwekee ahadi zifuatazo wewe mwenyewe bila kusukumwa na mtu. Ahadi hizi zitakusaidia kukupa nguvu, kukutia moyo pamoja na kukutoa hofu kwa mipango ambayo umekwisha kujipangia au unataka kujipangia.  Ni matumaini yangu, ahadi hizi zitafanyika msaada kwako na kuwa mwanga wa matumaini na mafanikio kwako:-

1. Jiahidi wewe mwenyewe kuwa imara kiasi kwamba hakuna kitu kinachoweza kuutikisa ufahamu wako. Katika maisha kuna changamoto nyingi sana ambazo zinasimama kama vikwazo katika mafanikio yako. Kuna magonjwa, mikosi, kudharauliwa pamoja na kubezwa. Wakati mwingine hata watu wako wa karibu wanaweza kuwa kikwazo katika mipango yako. Jiamini, jitathimini na uamini kwamba utafanikiwa tu hata kama ukikutana na changamoto za namna gani. Jisemee mwenyewe moyoni mwako kwamba "Kamwe sitakata tamaa" kisha songa mbele.

2. Jiahidi wewe mwenyewe kuwa mtu mwenye afya, amani, mafanikio na furaha kwa mtu yeyote utakayekutana naye maishani mwako. Kwa kawaida moyo hubeba machungu mengi, hubeba huzuni nyingi. Masikitiko pia huwa hayako mbali kuhakikisha kwamba unakata tamaa na kutokufanikiwa kwenye ndoto zako. Lakini zisiwe sababu za wewe kuwachukia wengine. Kuwa na tabasamu kwa kila mtu. Kamwe usiwategemee marafiki wabebe furaha yako. Kumbuka siyo kila mtu unaweza kumuelezea shida zako na akakuelewa. Wengine wataishia kukukejeli tu. Msanii wa Bongo Fleva Young Killer anakwambia "Ukipendwa ringa ukichukiwa jipe shavu". Simama imara. Acha kumtegemea binadamu mwenzako.

3. Jiahidi wewe mwenyewe kuwafanya marafiki zako kwamba kuna kitu wanacho katika fahamu zao, hawako watupu. Kufanikiwa kwako ni njia ya marafiki zako, ndugu zako au hata watu wengine pia. Jitahidi kuonyesha kwamba unawajali watu wengine. Wahakikishie kwamba unaweza kuwa njia ya wao kutoka kimaisha. Yapo mambo mengi sana unayoweza kuwafanyia na wakakuona wa maana. Unaweza kuwasaidia kwa  kuwashauri, kuwatia moyo hata kama wewe hauna kitu. Watakuja kukushukuru sana baadaye. Kumbuka milango ya mafanikio hufunguka mara baada ya kuwasaidia wengine.

4. Jiahidi wewe mwenyewe kufanya yaliyobora kwa kufikiri kwa namna iliyobora na kwa manufaa bora. Ukisha gundua sehemu iliyokufanya ukateleza na kushindwa kufanikiwa mwaka 2020, fanya tathmini na ujihakikishie kwamba makosa hayo hayajirudii tena. Fanya mipango kwa namna ya tofauti lakini yenye ubora wa hali ya juu mno. Hakikisha katika kila hatua unayoipiga ni hatua ya uhakika na yenye matokeo chanya maishani mwako.

5. Jiahidi wewe mwenyewe kujifunza kupitia mafanikio ya wengine huku ukiamini kwamba na wewe upo njiani kufanikiwa. Siku zote katika maisha kuna watu ambao huwa wanatufanya tutamani kufanikiwa. Kwa mfano ukimuuliza mchezaji wa mpira wa miguu hapa nchini anatamani kuwa kama nani atakwambia anatamani kuwa kama Marcos Rashford, Lionel Messi au kama Mbwana Samatta na kisha utamuona anaanza kuiga mitindo ya Messi au Samatta. Hata katika muziki vile vile, utawasikia wasanii wachanga wakisema wanatamani kufika mbali kimuziki kama Diamond Platnumz na wengineo. Bila kuwa na mtu aliyekutangulia mbele huwezi kufanikiwa maana huwezi kuiona njia. Jifunze kwa waliokutangulia huku ukiamini kwamba mara baada ya huyo "role model" wako anayefuata ni wewe.

6. Jitahidi kusahau makosa ya zamani huku ukitarajia kupata mafanikio makubwa sana mbeleni. Ni kweli kwamba huwezi kusahau machungu uliyoyapitia wakati wa nyuma lakini yasiwe kikwazo kiasi kwamba ushindwe kusimama na kusonga mbele. Jipe moyo, simama upya na kisha endelea na safari. Pale ulipoteleza weka alama ili ukifika uwe makini. Usikubali kuteleza tena.

7. Jiahidi wewe mwenyewe kuvaa sura ya ucheshi na kutabasamu mbele ya kila mtu unayekutana naye. Hata kama una sura mbaya tabasamu. Waonyeshe watu wengine kwamba unawajali, unawaheshimu na kuwathamini. Chuki hazitakusaidia zaidi zitaendelea kukutengenezea mazingira magumu tu. Utazidi kujiweka mbali na watu wako wa muhimu na hatimaye utakosa kabisa msaada. Tabasamu hata kama unapitia magumu. Hii itakusaidia kuongeza ujasiri.

8. Jiahidi wewe mwenyewe kutumia muda mwingi kuboresha mapungufu yako huku ukiamini kwamba huna muda wa kuwakosoa wengine. Achana na majungu na vijembe kutoka kwa marafiki. Wakati mwingine marafiki wanakuwa wanafiki, hivyo ukiwasikiliza sana watakupoteza. Ukishagundua ni wapi ulipoteleza parekebishe. Usisubiri kuja kuambiwa na rafiki yako au mpenzi wako kwamba hapa ulikosea. Watakusahihisha kisha watakutangaza kwa watu na kudai kwamba bila wao usingefanikiwa. Jipe shavu mwanangu!

9. Jiahidi wewe mwenyewe kuwa mkubwa kuliko uoga, mstaarabu kuliko hasira, imara kuliko mashaka na mwenye furaha kufagia chembechembe za chuki. Siku zote matokeo ya hasira ni mabaya sana. Waswahili hupenda kusema "hasira hasara". Ukikosolewa jua unaweza na unaweza kufanya kitu kilichobora zaidi. Acha kutumia hasira wakati wa kuwajibu maadui zako. wakati mwingine acha mafanikio yako yawe majibu tosha kwa kejeli na vijembe vyao. Rais wa zamani wa Ujerumani, Adolf Hitler aliwahi kusema " hauna kitu cha kuogopa zaidi ya uwoga wenyewe". Hutakiwi kumuogopa mtu. Tembea bila uwoga katika njia unayoamini kwamba itakuwa sahihi. 

10. Jiahidi wewe mwenyewe kutoshindwa katika maisha yako. Amini kwamba umezaliwa kushinda. Usiposhinda wewe atashinda nani? Mafanikio hawajaumbiwa ndege, bali ni mimi na wewe! Sasa kwanini ukate tamaa? Ondoa kabisa hizo sababu mufilisi za kukukatisha tamaa. Wewe ni bora kuliko unavyodhani. Hii itakusaidia kukuongezea nguvu za ushindani dhidi ya changamoto za maisha.

Ni matumaini yangu kwamba mwaka 2021 utakuwa wenye mafanikio makubwa sana kwako.   Utafanikiwa kununua kiwanja kama ulivyopanga, utafanikiwa kujenga nyumba kama ulivyopanga, utamiliki biashara kama ulivyopanga na mambo mengine ambayo umejiwekea ahadi. Ni marufuku kukata tamaa mshkaji wangu.  Kikubwa ni kuendelea kupamba na kumshirikisha Mungu unayemwamini. Wewe ni mwamba! Wewe ni shujaa! Kila la kheri katika kusaka mafanikio ndani ya mwaka huu wa 2021.

==== _Mwisho_ ===

#Chief_Editor
@Msomi_Huru.

Comments

Post a Comment

Popular posts from this blog

KWA NINI WATU WENGI HAWANA UTAMADUNI WA KUJISOMEA VITABU?

Image
 Kwa Nini Watu Wengi Hawana Utamaduni/Hawapendi Kujisomea Vitabu?  (Sehemu ya Kwanza) Habari... Siku kadhaa zilizopita niliandika kwenye kurasa zangu za mitandao ya kijamii mara baada ya kufanya kipindi cha 'The Fix' cha redio kuhusiana na mada inayosema 'Kwa Nini Watu Wengi Hawapendi Kusoma Vitabu?' Nakumbuka baada ya chapisho lile niliahidi kukufikishia somo lote hatua kwa hatu. Sasa leo natamani somo hili liwe kama sehemu ya kwanza na mada ile ile ambapo leo tutaangalia sababu za watu wengi kutokuwa na mwamko, shauku ama utamaduni wa kujisomea vitabu. Zifuatazo ni baadhi tu ya sababu za watu wengi kutokuwa na utamaduni wa kujisomea vitabu; >> Mabadiliko ya Teknolojia (Simu na Mitandao ya Kijamii); Vifaa vya kisasa kama simu za mkononi, kompyuta, na mitandao ya kijamii vimechukua nafasi kubwa katika maisha ya watu. Watu wengi wanapendelea kutumia muda wao kwenye mitandao badala ya kusoma vitabu. >> Video na Habari za Papo kwa Papo; Watu wanaweza kupata hab...
Read more

Mbwa Bado Hajafa! (Usikubali Kukata Tamaa)

Image
Meshack Siwingwa 0764 987 588 Jamaa mmoja alikuwa akisafiri kutoka nyumbani kwake kuelekea mjini majira ya saa moja asubuhi. Baada ya mwendo wa kama saa mbili hivi alikutana na kijana mmoja akiwa amesimama barabarani akingojea kumwona mtu aendaye mjini ili aweze kumuomba 'lift.' Kijana huyu alikuwa amebeba vifaa kadhaa vinavyotumika kwa ajili ya usafi wa kuoshea magari vile ambavyo alivimudu kuvibeba. Kando ya huyu kijana alikuwa amelala mbwa aliyeonekana kuwa dhooofu bin hal kwani alikuwa akitweta kwa uchungu uliosababishwa na maumivu aliyokuwa nayo. Yule kijana alipunga mkono kwa jamaa ndipo jamaa aliposimamisha gari yake na kuamua kumsikiliza kijana. Kijana alimweleza jamaa kwamba alikuwa anaelekea mjini kumtibia mbwa wake na kwamba baadhi ya vifaa kadha alivyokuwa navyo alitegemea apate kazi za kuosha magari pindi afikapo mjini ili aweze kupata fedha za kumudu gharama za matibabu ya mbwa wake. Jamaa alishangaa sana baada ya kuona hali ya mbwa wa yule kijana na ndipo alipoam...
Read more

KAULI KUMI ZA HAYATI MWL. JULIUS K. NYERERE KUHUSU ELIMU NDANI NA NJE YA NCHI

Na; Mashaka Siwingwa +255764987588 ----------------------------------------------------------------------------------------------------------------------------- Ni miaka mingi imepita tangu atutoke baba wa taifa Hayati, Julius Kambarage Nyerere. Ushujaa na uhodari wake katika kupambanua mambo pamoja na kueleza vitu bayana kunamfanya aendelee kuwa shujaa asiyesahaulika. Wakati wa uhai wake, baba wa taifa alisisitiza sana juu ya suala la elimu hapa nchini. Falsafa yake ya kuamini kwamba elimu ndiyo silaha pekee ya kuufikia ukombozi wa kweli hasa kifikra. Katika nyakati tofauti tofauti, katika sehemu tofauti na katika muktadha tofauti, Hayati baba wa taifa aliweza kuonesha wazi msimamo wake juu ya mfumo wetu wa elimu. Kati ya mengi aliyoyazungumza, leo nimeamua nikukusanyie kauli kumi tu alizowahi kuzitoa shujaa huyu.  Twende sawa; 1. Kauli aliyoitamka mnamo tarehe 31 Desemba, 1969 akizungumza na vyombo vya habari kuhusu malengo ya Elimu ya Watu Wazima. Alisema, "... education is som...
Read more